পানীৰ বটলটো লগত লৈ ফুৰাটো এতিয়া আমাৰ দৈনন্দিন জীৱনৰ এক সাধাৰণ অভ্যাস। অফিচ, স্কুল-কলেজ, জিম অথবা যাত্ৰা—সকলোতে প্লাষ্টিকৰ বটলৰ ব্যৱহাৰ ব্যাপক।কিন্তু আপুনি কেতিয়াবা ভাবিছেনে, একেটা প্লাষ্টিকৰ বটল বহুদিন ধৰি ব্যৱহাৰ কৰি থাকিলে শৰীৰত ইয়াৰ কি প্ৰভাৱ পৰিব পাৰে?

প্লাষ্টিকৰ বটলত লুকাই আছে নেকি স্বাস্থ্যৰ বিপদ?

কিছুমান প্লাষ্টিকত Bisphenol A (BPA) আৰু Phthalatesৰ দৰে ৰাসায়নিক পদাৰ্থ ব্যৱহাৰ কৰা হয়। এইবোৰৰ কিছুমান শৰীৰৰ হৰমনৰ স্বাভাৱিক কাৰ্যত প্ৰভাৱ পেলাব পাৰে বুলি গৱেষণাত উদ্বেগ প্ৰকাশ কৰা হৈছে।

বিশেষকৈ DEHP নামৰ Phthalate-ৰ ক্ষেত্ৰত স্বাস্থ্যজনিত আশংকা আছে বুলি আন্তঃৰাষ্ট্ৰীয় গৱেষণা সংস্থাসমূহে উল্লেখ কৰিছে।

অৱশ্যে, ইয়াৰ অৰ্থ এইটো নহয় যে প্ৰতিটো প্লাষ্টিকৰ বটল ব্যৱহাৰ কৰিলেই কৰ্কট ৰোগ হ’ব। বিপদ নিৰ্ভৰ কৰে প্লাষ্টিকৰ ধৰণ, ব্যৱহাৰৰ পদ্ধতি আৰু সংস্পৰ্শৰ মাত্ৰাৰ ওপৰত।

গৰম পানী প্লাষ্টিকৰ বটলত ৰাখেনে?

এই অভ্যাসটো এৰাই চলাই ভাল।

উচ্চ উষ্ণতাত প্লাষ্টিকৰ পৰা কিছুমান ৰাসায়নিক পদাৰ্থ খাদ্য বা পানীত মিহলি হোৱাৰ সম্ভাৱনা বৃদ্ধি পাব পাৰে। একেদৰে, প্লাষ্টিকৰ বটল বহু সময় ৰ’দত থৈ পানী খোৱাটোও এৰাই চলা উচিত।

একেটা বটল কিমানদিন ব্যৱহাৰ কৰিব?

এবাৰ ব্যৱহাৰৰ বাবে নিৰ্মিত single-use plastic bottle বাৰে বাৰে ব্যৱহাৰ কৰাটো উচিত নহয়। সময়ৰ লগে লগে বটলত আঁচোৰ, ক্ষয় বা ফাট সৃষ্টি হ’ব পাৰে।

বটলটো পুৰণি বা ক্ষতিগ্ৰস্ত হ’লে সলনি কৰাটো অধিক সুৰক্ষিত।

কেনেকৈ সাৱধান হ’ব?

স্বাস্থ্যৰ কথা চিন্তা কৰি প্লাষ্টিকৰ সলনি ষ্টীল বা কাঁচৰ বটল ব্যৱহাৰ কৰিব পাৰে।প্লাষ্টিকৰ বটল ব্যৱহাৰ কৰিবলগীয়া হ’লে—

 -গৰম পানী নাৰাখিব।

– বটলটো বহু সময় ৰ’দত নথ’ব।

– BPA Free লেবেল পৰীক্ষা কৰিব।

– ক্ষতিগ্ৰস্ত বা পুৰণি বটল সলনি কৰিব।

– Single-use বটল পুনৰ-পুনৰ ব্যৱহাৰ নকৰিব।

পানী খোৱাটো স্বাস্থ্যৰ বাবে জৰুৰী, কিন্তু পানী ৰখা পাত্ৰটো কেনেধৰণৰ—সেই কথাটোও সমানেই গুৰুত্বপূৰ্ণ।